Lets beejgewerk d.d. 30 1 mei 2009
Goojendaag beste laezer,

Vastelaovend leet alweer ein waek achter ós (maar we veule 't nog). 't Haet, wie al dökker gezag, eine verpletterende, ónoètwisbare indrök achtergelaote. Weej haope det dit oèt de verhaole blièk.
In de 1e waek van maart waere de ruùm 4000 foto's gesorteerd en de allerleukste in 't daagbook verwerk. De euverige foto's waere beej Multimedia geplaats.

Nao de vastelaovend zien der ouk nog ein aantal "optraejes" van 't Dreejspan. Mochte die leuk en/of interessant zien, dan schrièf en plaats ik ouk dao ein stökske euver

In November, net veur ein groëte reis, kwaam Vors Joeccius XI ‘m vraoge

Of hae de stap nao ’t Prinsdom dörfde te waoge

Hae hoofde dao gaar neet euver nao te dinke

“Lucas d’n 1" dét vònd hae waal sjiek klinke

Nao 8 oor vleege in Gambia aanbeland

Vroog Lucas per SMS ziene 1e Adjudant

“Kins dich 17 daag op lakschoon loupe”?

Waat ein vraog, wae wilt die dinger überhaupt nog koupe?

Nao ens op d’n kalender te hebbe gespant…

(22-11-2008, um 11.11oor) Waord die vraog toch waal hiël erg kwant

"Maar dan gén gedeuns euver “vruikes” en gén lakschoon"!!

Ónder die veurwaardes woel Adjudant 1 zeker ouk meidoon

Adjudant Joep, det meus ’t dus waere

Gruuëts? Wie ‘nne pauw, mit vaere!

Metein kreeg dae ein taak, um aan ’t idee te winne

Joep, dich schriefs de breve, zoëdet de Venlonaere òs good liëre kinne

D’n tiéd kroop veurbeej, maar intellik kwaam Adjudant 1 te weite

Wie Adjudant 2 kwaam te heite

Nao weer 8 oor vleege, waas hiel rap beslis

Det d’n andere Adjudant, Paul, “Dae van de Formido” is

Ouk Paul kreeg metein van d’n Hoëgheid te huure

Det hae zich ouk op ’n opdrach kòs gaon oétkure

Paul: doot dich de pecunia, de bònne en kedoos

Is dét allemaol klaor, dan geit ’t éch loos

‘t Dreejspan compleet, dan vlot aan de slaag

Vuuël stiekum geregel, de godsgansendaag,

Nemus meug ’t weite, gen vrinde, femilie of zelfs Joekskapel

“Misleide en leege”, zoë hit òs niejste spel

Nao Nappes op de Proms en nog waat optraejes

Mutse en mantels passe en ‘t verzinne van nog miër raejes

Waorum we later ware of soms gaar neet verschene?

Of wie ’t toch kwaam det Pap zoë dök waas verdwene?

Dao kwaam langkzaam maar zeker de volgende opdrach op de rol…

“Schriéf in plat Venloos ein halve Träöt-pagina vol”

Maar dan waal wie Jocus ’t gaer haet : mit hudjes, compleet “verkiërd”

Verkiërd? Jaozeker, want zoë hebbe weej ’t noeits geliërd

“Hudjes zien veur op de kiëbus en neet um op letters te zette”

Althans, det zag Sjraar Lemmen vruuger en vroog òs um wiejer op te lette

Want schoën Venloos schriéve, meus (mòt) volges de letter van de Venlose schriéfkuns

Dus maak gen vaute, asse mit dien stökske in de Träöt kumps

Heb geej dit ganse verhäölke heejbaove gelaeze

Dan weit geej noow ouk waat weej hebbe môtte paeze

Um foutloos Venloos te schriéve

Op ein veur idderein laesbare wiéze

En kòmp geej in dit stökske ein waord taege waat geej neet kint verklaore

Dan zoelt geej de informatie in ’t Venloos waordebook aan kinne baore

’t mak aevel nappes oét, det zult geej mòtte be-ame

Veurôs is ’t belangrieks: Vastelaovend…… SAME

Vuuël laes- en kièk plezeer!
Reacties kint geej kwiët in 't gastebook.

Lucas I, Paul & Joep

Op dees pagina's kint geej 't ganse "proces" vólge vanaaf "De vraog" wiès aan 't aaftraeje van 't Jocus Dreejspan 2009.