NUATH-Sponsoren
Bezeukers
Weej hebbe 2 gaste in de lóchInlogge veur NUATH-leeje
|
7 mei 2010 - Nappes op de Proms 7 ‘t Nappes comitee haet beslaote um nog eine kiër Nappes op de Proms te organisere, en waal op 23 jannewari 2011. Raeje veur dit besloèt is gelaege in ’t feit det de organisatie amper meugelikheeje veur verniejing vónd binne ’t bestaonde concep. Naevebeej wuuërd ’t nappes-concep in toenemende maote door andere organsiaties euvergenaome. ’t Beste veurbaeld heejvan waas de Boetezitting van 2010, op ’t plein veur ’t stadhoes. De organisatie wilt nog eine kier groeëts oètpakke met Nappes op de Proms 7, in de meis originele setting: ein 1-daags aevement veur ein groeët publiek. Heejdoor is de organisatie genoeëdzaak um eur thoèshonk Baer de Woers veur eine kier um te ruile veur de Venlonazaal (wao ’t allemaol is begós). Nappes op de Proms 7 geit alle veurgaonde edities euvertreffe in elk opzich. M.a.w. de lat weer hoeëger…………. Det belaof waat….. Uiteraard zal de organisatie nao dees letste oétvoering neet stil gaon zitte, maar nieje ideeje gaon oétwerke en op ein later tièdstip met ein ander spraokmakend programma op de proppe kómme! Weej halde óg op de huuëgte 7 maart 2010 -- NUATH’s 33 Jaorvergadering Veur ‘t iërs in eur bestaon hilt NUATH eur jaorvergadering op ‘nne zóndaagmiddaag. Ein traditionele vergadering met officiële agenda, beslissinge, pieke-verantwaording, bestuursverkeezing en evaluatie van ’t aafgeloupe seizoen. ’t Niej bestuur besteit noow oét Lucas as veurzitter, EriC as Penningefoekser en Ferry as sikkertaris. Jaowaal beste laezer ouk in ’t bestuur sleit de verjónging toe. En maar good ouk. NUATH wilt tenslotte ouk eur 4x44, 5x11 en 6x11 jäörig jubileum viere! Det ’t aansloètend aan de vergadering nog lang ónröstig bleef beej Baer de Woers meug duùdelik zien. Enneh, kint geej ein geheim beware? Dan meug geej neemus vertelle det d’r eine 7e Nappes op de Proms aan steit te kómme in 2011….. 16 fibberwari 2010 – Boerebroelof ’t duuijt (het dooit)……….. De zón schient, waat ein prachtig begin van d’n moeijsten daag van de vastelaovend! Rónd 12.00oor verzameld ’t gedeuns zich weer beej BdW. Met eine stevige brunch wuuërd d’n baom veur vandaag gelag. Rónd 13.30 zien we compleet en trekke met d’n optoch mei. Op de Vleisstraot guuëf d’n termomaeter +6 grade aan, det schaelt al gauw 12'C (!) met gister. Nao de traditionele trouwerie en optraejes van o.a. de LVK winnaers Weej-3 (Vandaag) gaon we weer op waeg nao de BdW. ’t Publiek (binne en boete) wilt meziek en dae kriege ze dan ouk. 2 sets waere d’r gespeuld. Prachtig um vanaaf de bühne te zeen det de minse boete op de Steinstraot lekker meidoon. Taege 22.30 gaon de meiste NUATHers nao de merret veur ’t Stadhoès um met Zoemaar en later Jocus, de mutse aafte zette en de Vastelaovend aaf te sloete. Ónder de toeëne van Van Gelder (De Ster) zingk ’t “volk” nog eine kier same…. En dan is ’t al weer um, eine sjieke, kalde en besniejde vastelaovend 2010 geit ’t daagbook in. Beej deze! 15 fibberwari 2010 – Vastelaoves maondaag D’n daag van d’n optoch begint opniej met ein laog sniej. De gemeinte haet de optochroute gestruijd dus alle werk waat gestaoke is in waages, kostuums e.d. is gelökkig neet vergaefs gewaes veur all optochdeilnemers. Vanaaf 09.30 oor waere de NUATHers geschmienk en wuuérd d’r ‘nne baom gelag beej BdW. Um ein oor of 13.00 vertrek ’t gedeuns nao de Pónniewaeg um zich aan te sloète in d’n optoch. ’t Deurde waer vuùls te lang veur det d’n optoch begós te trekke en wie hae leep, tjao, toen leepe eigelik nog neet. Met alle respec veur de organisatie, gangk toch ens in beejveurbaeld Straole kièke wie dao ’t e.e.a. georganiseerd wuuërd….. Guus, Leon en Ferry waare aan ’t begin van d’n optoch in gen velde of waege te bekinne. Bleek det die zich ein “boete-hoéskamer” hadde toegeëigend, met verwerming en drank!!! ’t bleef gelökkig druuëg en ein waterig zunke waas zelfs te zeen! Lucas en Joep woordte nog efkes geïnterviewd door Wiel Hermans dus we zulle weer te zeen zien op de Stadskwats. Det vuuël minse door de kelt thoès gebleve ware meug ouk duùdelik zien. ’t Waas beduidend röstiger langs de kant van d’n optoch. Aevegood haet idderein waer genaote en loog ’t huùgtepunt traditiegetrouw op de parade. 2 doefte optraejes ‘s aoves beej Baer de Woers/Steinstraot en dan zit de (muzikale) daag der alweer op. Waat vluùg d’n tièd…….. Net wie gister wei-erd de kapel oèt euver de heilige huuskes in de stad. Daag 2 is ouk passé. 14 fibberwari 2010 - Vastelaoveszóndaag Vastelelaovend, vastelaovend, sjiengele-sjiengele-sjiengeleboem! Nao waeke verschillende optraejes te hebbe geträöt in d’n aanluip nao vastelaovend is ’t noow dan éch zoeëvaer, Vastelaovend. Vandaag verzameld ’t gedeuns zich in de Maaspoort um ff te luùstere nao Van Gelder. Die jonge gaon der waal kómme, klasse optraeje! Nao waat schmienk op de mörfkes te hebbe gesmaerd doon we waat optraejes in Baer de Woers en oppe Steinstraot (inträöte) um vervólges nao ‘t (Joekskapelle) huuëgtepunt te gaon. De JoekskapelleParade. Óndanks de kelt is d’r weer ein massa minse op de bein um dit aevenment mei te make. Traditioneel meug NUATH de aovend aafsloète. Ein neet miër weg te dinke aevenement! Nao dit optraeje weijt de kapel oèt euver de heilige huuskes in de stad. Daag 1 zit der dan alweer op……… 13 fibberwari 2010 - Boetegewoeëne Boetezitting in de Venlose Binnestad Jaowaal, de Vastelaovend is begós, met sniejende kelt en sniej…. NUATH waas gevraog as aafsloètende act op ’t Fiscus-podium op de Parade. Det is ein vraog wao desse netuurlik gen nae taege kins zegge. Doordet ’t L1-programma in de Zoepkoel maar wies 14.15 oor deurde meus d’r op snip en äörke ein aansloètend programma gemak waere. NUATH, Wir sind Spitze (Ulestraote) en Óg nae toch woorte heej geprogrammerd, waobeej NUATH d’n aaftrap móg gaeve. Kleine optraejes zoeé-wie beej ’t Prónke zien sjiek, maar 2x optraeje veur in totaal 10.000 vastelaoves gekke is netuurlik hielemaol waan. ‘nne Prachtigen daag met erg gooje optraejes. Dit verzinne weej neet zelluf, maar det bleek oét de reacties van publiek, collega’s en organisatie(s). Bekièk de foto’s maar ens. Mórge gaon we dan eg van start (?) met optraejes op de Steinstraot, Baer de Woers en JoekskapelleParade. Vastelaovend, vastelaovend, lalalala 31 Jannewari 2010 - Prinseresèpsie van VG De vogelhut Nao alle “ervaringe” die gisteraovend zien opgedaon op ’t Hofbal (Lucas en Joep) maar nog vuuël miër door de res van ’t gedeuns beej de ThieTuite in Lómm meus de kepèl zich vandaag door sniej en wind de berg op schravele nao de vogelhut. Veur de 34e kier (!) haet NUATH dees biezóndere receptie meuge opluustere. Biezónder in mièrdere opzichte. NUATH speult eigelik gaar gen recepties, behalve dees dan. Waorum heej dan waal? Heej gebeurt alles taegedraods en “det pas in ós stráötje”. Neet idderein snap perciès de spelregels. Zoeë kump ’t waal ens veur det ‘t ein of ander vastelaoves gezelschap waat geïrriteerd rak as de door eur aangevraogde “Échte Venlose 5-klap” vervange wuuërd door “De wortel en de pin”, “De Wienbol” of “zakdukske legge, neemus zegge”. Beej de Vogelhut weite ze al 34 jaor neet baeter……. En det vinde zeej en weej moeij. “t Hoeëgtepunt is de jáörliks grutter waerende Meulewiekers karavaan oét de Miëterik. 2 Busse vol jeugdige vastelaovesvierders braeke op ein carnavaleske wies de tent aaf. Nao ruùm 5 oor tráöte zien de lippe en hand nao de filesteine. En dao doon we ’t veur. Ouk heej geldt: Vólgend jaor weer!! 30 Jannewari 2010 - Aafsloéting Prinseresèpsie van de Thiëtuite in Lómm Veur de 5e kiër nao de Thiëtuite in Lómm. Alles waat dinkbaar is haet zich dao aafgespeuld. Eine geweldig kwante aovend waobeej ein bankstel én hangtaofel met bloomboeketjes op de buun ein hoeselikke sfeer gegaeve hebbe. As d'r al eemus twièfelde aan alwaer NUATH in Lómm (?); dae twièfel is noow weggenaome. Vanoét 't Venlose winse weej de Thiëtuite eine joeksige vastelaovend. Volgend jaor zièn weej waer van de partiej (as ut aan ós leet). As ut good is, treffe we dan eine kleine van ongevièr 3 maond ald. 24 Jannewari 2010 - Prinsematinee van de Beerpiep in de Haandert Hadde we 't gister euver tradities? Ós optraeje van vandaag beej De Beerpiep, tiejes ’t Prinse matinee is der ouk zoeë eine. In ein van de sjiekste zale van Groeët Venlo (de kleine zaal van de Haandert) woorte door de Beerpiep Thei en Marij in ’t zunke gezatte. Aansloètend woordt ’t springende 3 Span bekind gemak. En dan meug t daak der aaf… NUATH geit loos. Heej is det euveriges hiel mekkelik, ’t publiek is nao speeches en prissentaties waal toe aan waat aafleiding, en det kriege ze. Vólgend jaor weer? 23 Jannewari 2010 - Pallesaotebal in Ut Tref En dan is ’t zaoterdaag d’n 23 jannewari en dan wuuërd d’r waer geträöt. Ditmaol op ’t Pallesaotebal van VG De Kwas in’t Tref in Venlo-Zuid. Ouk heej kinne we ónderhand spraeke van ein “traditioneel” optraeje. Same met de Mixx-vrinde, Fans Theunisz, René Scheffer, Sjraar Peetjens, Jacques-Paul, Marc en Bart en Jans(s)en wuuërd d’r weer eine echte vastelaoves-aovend van gemak. Dit alles in ein prachtig versierd Tref. Ein good optraeje met aansloètend nog ein paar klep. Ouk alweer traditioneel wuuërd d’r aansloètend zelf gemakde frites met goulash gebik beej Jan en Marie-Rosé. Heej dook Sjraar Peetjens ouk plotseling op. Langk verhaol kort. Weer ‘nne aovend um beej te schriève, en det is beej deze dus gedaon Morge: Beerpiep… 17 Jannewari 2010 - Boeremoosbal in de Maaspoort Veuraafgaond aan d'n Boeremoosbal haet NUATH ein beejdrage gelevert aan de recordpoging van de Toddezek. Um 15.00 oor verzamelde 't gedeuns zich beej Rietje, in "D'n Hertog van Gelder" um 't leedje "Wat zaesse mich noow" in te studere. Rond 16.00 oor waas dit gebeurd en waas 't wachte op de Toddezek. Sniejende kalde wind makde 't der neet plezaerig op, maar de keld en 't wachte woordte beloeënd met ein leuk mini optraeje en ein toet beer. Op nao 't Boeremoosbal.... Nao 28 jaor op 't Boeremoosbal te hebbe gespeuld waas NUATH in 2009 neet gevraog. 't Gedeuns haet daen aovend ein optraeje verzörg in Heerlen. Meugelik det allebei de partieje dao neet gans gelökkig mei waare want 't NUATH gedeuns stónd in 2010 waer op de houfbuun van 't Boeremoosbal. (Gelökkig). 't Daak meus der aaf en det is gelök. Ein prima optraeje en hièl gooje reacties van alde en nieje NUATH vrinde. Det der zelfs vanoét Kessel op internet gekeke wuuërd of NUATH Waal/Neet örges speult is waal hièl erg gaaf. 't Boeregezelschap oét Kessel waas daorum dit jaor ouk weer van de partiej in de Maaspoort. Boeremoosbal waas weer ein gooj opmaot nao vastelaovend 2010, met vólgende waek o.a. optraejes op 't Pallesaote-bal in 't Tref en de Beerpiep in Tegele. Weej zeen ós waal weer örges! 3 oktober 2009 - Rens beej Jocus Leedjesaovend Vanaovend haet ózze pensörgelspeuler Rens same met ziene vrind Luc Faessen 't leedje "Kald!" op Jocus-bühne gebrach. Ein neet onverdeenstelikke plek op de rangliés waas 't resultaat, maar helaas neet beej de iërste veer. Klasse gedaon jónges ! 5 juli 2009 - In memoriam Tom Bartels 19 & 20 juni 2009 - Met "Us Em Levve" nao Kölle 5 april 2009 - 33e Verjäördaagsfees Henk, JanA, Tom, Luc en Harry hebbe vandaag veur alle leeje, Iëre Leeje en partners ein prgramma ineingedreijd. Dit programma begint met eine brunch beej Tine en Fried in 't Tref en eindig met eine diner beej Baer de Woers. In d'n tössetied beklumme weej in gruupkes d'n tore van de Martinuskerk, bezeuke weej 't Stadhoes, doon waat heiligehuuskes aan, beantwaorde vraoge euver Venlo, zeuke ós d'n blubber nao allerhande lokaties in de stad die weej op foto's zeen en luùstere nao allehande mezièk. Eine memorabelke daag, dae we jaomer genóg -/- ein NUATH lid (Daan) mótte doorbringe. Daan is door ziene rök gegaon in ein klein huuske..... Sterkte Daan en baeterschap. 22 maart 2009 - Venloop Ónderwiel NUATH op de lokatie "Formido" beej Adjudant Paul eur muziekale hoeëgstendjes luuët huùre aan luipers en toeschouwers zwoege 4 NUATH leeje euver de halve marathon en det daags nao ein optraeje... Maurice Delsing, Sonny Corneth, Jan Gatzen én Hoeëgheid Lucas I (Peeters) vertaegeweurdige NUATH op ein zier sportieve wiès. We hadde allemaol mei wille loupe, maar wae had dan mótte speule?? Ein knappe prestatie veur ós sportieve leeje die, met de vastelaovend nog in de bein deze aafstand hebbe weite te euverwinne. Perfietsia allemaol en uiteraard ós complimente. Lucas mak de letste 500 maeter vol mét prinsemuts op de kiëbus waat uiteraard de nuuëdige aandach krieg van de pers. Klasse gedaon. 7242 Lucas Peeters Venlo Halve marathon 1:56:43 6597 Sonny Corneth Venlo Halve marathon 1:58:50 6893 Jan Gatzen Venlo Halve marathon 1:59:47 6560 Maurice Delsing Venlo Halve marathon 2:00:10 21 maart 2009 Thiëtuite Lómm Per huufker waere weej aafgehaold um ós muzikale kunste te vertuuëne in Lómm. Heej viert de jeugaafdeiling van de Thiëtuite eur 4x 11 jäörig jubileum. Nao diek ein oor in de ziër comfortabele huufker arrivere weej in Lómm en speule dao wiès ein oor of 01.00. You never walk alone wuuërd veur de aafwisseling ens zittend gedaon. Ouk neet verkiërd, zeker neet met 't oug op de Venloup, morge. 10 fibberwari 2009 Vanaaf noow kint geej dageliks de belaevenisse van Hoeëgheid Lucas I en Adjudante Paul en Joep vólge via dees NUATH site. Reagere kin in 't gastebook. 31 jannewari 2009 Pallesaotebal beej de Kwas Nao 't grandioze succes van vurrig jaor meuge we opniej ós opwachting make in 't sfeervolle Tref beej Tinie en Fried. De Kwas haet weer gezörg veur ein daverend programma wao idderein welkom is. 't Lièk ein bietje op de vruugere bals, wao M!xx en NUATH de zaal móchte vermake met mezièk, aangevöld met diverse zengers en zangeresse. Nao 't oètrope van de nieje Prins van de Kwas zónge Frans Pollux met Marco Schell 'nne gas leedjes waonao weej weer móchte probere de zaal in stumming te halde. Det lökde weer op ein gooj wiès. Good Old Sjraar Peetjens haet nog ein 2-tal leedjes met ós meigezónge, waat de feesvreugde allein maar verhuuëgde. Eine sjieke aovend dae we "traditioneel" aaf hebbe geslaote beej Jan en Marie-Rosé met 'nne Goulash mit hausgemachte pommes. Vanaovend wuuërd ouk bekind det ós ald leej Mark Hamans en Sjoerd Treuen zien oétverkaoze as resp. Prins Mark 1 en Adjudant Sjoerd beej VG De Vogelhut. Adjudant Funs completeert 't dreejspan. Vanaaf dees plaats alvés van herte perfietsia! Hald óg maar vas op óg receptie!! 24 jannewari 2009 Bokkeriejs Heerlerheide Veur d'n 2e kiër in korten tièd dale we weer per bus aaf nao 't zuuje van ós provincie. Aangezeen we d'n beerloze Herrensitzung nog neet vergaete zien (11 jannewar j.l.) hebbe we ós eige beer maar meigebrach. Det ózze chauffeur begaon is met 't reile en zeile van NUATH blièk oét 't feit det hae veur de zekerheid oúk ein kretje bruin haet meigenaome (Sicher ist sicher). De Bokkeriejs óntvange ós met alle égards en blieve zich veróntschöldige. Neet allein aan ós maar aan idderein dae 't huùre wilt. Ruùm 5000 bónne hebbe ze truùk mótte neeme, en det zaet genóg..... We äöpene 't programma en dan blièk det 't publiek (en det is eine zwièk) ózze mezièk waal degelik wet te waardere. Midde in 't programma make we nog es ós opwachting met ein optraje van 3 keteer. De minse gaon op de steul en 'nne polonaise of dreej kinne we ouk waorneme. Dees missie is geslaag, en 't beer? Det bleef deze kiër gewoeën struime! 16, 17 en 18 jannewari 2009 Nappes op de Proms 6 En dao waas dan intellik 't Nappes op de Proms weekend. Nao zón 10 maond veurbereiding (van ens per 2 waeke nao ens per 4 oor vergadere en euverleg) kóste we eine aanvang make met ós fees-jubileum-3x11-weekend. Op vriedaag eine gooje start met 't Nappes op de Proms veurpreuve. Met die Powerhosen met eur waanzinnige act én Us em Levve oét Kölle. Ein vol Baer de Woers haet genaote van al det Duitse (sóms Over the Top, maar hilarisch) Duits schlager geweld. In ein waord SCHITTEREND. Nappes zelf waas HIELEMAOL AAF, met op zaoterdaag ein waat jeugdiger publiek t.o.v. de zóndaag. Que sfeer waas 't op allebei de oétveuringe prachtig moeij. 't meis toepasselikke waord waat Nappes op de Proms 6 kin umschrieve is KIEPEVEL! Talloze hoeëgtepunte wisselde zich aaf op de bühne en 't publiek haet met volle teuge genaote, net wie de 150 artieste euveriges. Nao 2x 65 leedjes kwaam der toch weer ein ind aan dit spektakel. Kièk maar ens op de foto pagina's en in 't gastebook. Of der ouk eine Nappes op de Proms 7 geit kómme? Leuk detail: op allebei de daag is 't programma neet miër dan ein keteer oét geloupe! en det op 5,5 oor programma.... 17 jannewari 2009 Nar van de 3-Kes Ózze Luc "D'n Blauwe" Schouwenberg is vandaag as Nar geprissenteert beej de 3-Kes. Luc, names ós allemaol PERFIETSIA en eine sjieke vastelaovend gewins!!
11 jannewari 2009 Beerloze Herrenzitsung Vandaag vruuëg oèt de vaere en de bus in richting Heerlerheide. Heej organisere de 10x 11 jäörige Bokkeriejs eur Herrenzitsung. 900 man in ein prachtig theater. 7 jannewari 2009 De PR umtrent Nappes op de Proms is uiteraard ouk noow weer oétstaekend, kiek maar ens op deze link: http://www.limburger.nl/article/20090107/REGIONIEUWS02/841790781/1056 3 jannewari 2009 "Us em Levve" nao Baer de Woers 't Nappes-weekend oétgebreid wuuërd met ein extra feesje! Dit verjäödaagsfees wuuërd op vriedaagaovend 16 jannewari 2009 georganiseert door- en gehalde beej Baer de Woers met neemues minder dan de Kölsche topband "Us em Levve". Zeej gaon ein compleet programma speule beej Baer de Woers. De nieje Venlose Schlagerband "Die Powerhosen" make 't fees compleet deze aovend. Entree: €5,- Aanvang 21.30oor, Baer de Woers, Steinstraot Venlo 13 december 2008 Op oètnuuëdiging van de Blierickse Herte speult Projec Zurtitrie eine set tiejes 't Sponsor/Kersconcert in 't Raodhoes. Drek nao de pauze wuuërd 't publiek verras met ós leedjes. Good optraeje in ein verrassende setting.   
11 december 2008 Op 11 december 2008 is kaartverkoup veur Nappes op de Proms van start gegaon. Ouk dit jaor geldt: Bin op tièd, want vol is ég vol!! Kaarte zien te koup beej Grandcafé Baer de Woers aan de Steinstraot in Venlo. 26 november 2008 Ós singletje "Brave stad aan de Majjem" haet de 2e plaats in de Venlose 15 weite te bereike. Zeker ein gooj prestatie as me bedink det NOL en Rowwen Hèze de plaatse 1 & 2 al waeke bezette. Misschien wuuërd 't tièd um ózze volgende single te "lancere"?  15 november 2008 23 oktober 2008 De letste schandale (zoeë die der al zien), waere heej, uiteraard, as iërste vermeld. Laes gerös wiejer
't Allerieërste NUATH-jaorverslag hebbe weej gevónde in 'n kukskestrómmel op de zölder van Ben Nijholt, lid van 't ieërste aor. Det unieke dokument kint geej heej inzeen !!!
NIEJSBREEF NUATH Nummer 3 is oét ! Aan te vraoge beej: Dit emailadres is beveiligd tegen spambots, u heeft javascript nodig om het te kunnen bekijken Ónderwerpe: Dankwäördje Winnaars NUATH quiz Truùkblik Vastelaovend en vuuël miër !!! downloade kin heej
5 fibberwari 2008 - Boerebroelóf en BdW 't is druuëg Néet de vruug oét de pölf vandaag. Taege 11 oor begoof zich 't NUATH gedeuns richting Steinstraot veur 'nne goojen brunch. Aansloètend uiteraard met d'n Broelofsoptoch mei. Gewoeën metein beginne met loupe en ós noow ens nix aantrekke van puntmutsers die dich op ein bepaold plekske wille laote loupe (zoedesse as letste op de Mert aan kumps). Lekker doorgeloupe en op de Parade met verschillende kapelle mei geträöt die zich ein plekske hadde veroverd (en dus neet leepe...) Aansloètend de altièd weer leuke Broelóf met eindelik weer ens ein paar minse binne 't gezelschap die gén muzikaal geveul hadde. Sjiek, det huùrt der gewoeën beej. Nao eine telder Boeremoos rap de bühne weer op um dét van gisteraovend nog ens dunnetjes euver te doon. Amper aan de geng makde Prins Ton same met Frans en Sjaak eur opwachting. Ein paar leedjes hebbe ze weer met ós meigebröld. Erg gaaf asse zuus wie die dreej opgaon in eur rol. Des van twieë kante geneete!! 't Joekskapelaoke waas oét de kas gehaold, en de minse kóste ein leedje op de bühne, same met NUATH mei brölle. Det hebbe weej gewete. In no-time hadde we ruùm 30 aanmeldinge (38). 't Niveau waas hoeëg volges Jan en Leon, maar zeej beoordeilde allein de vrouwluuj (op uuterlik en NEET op zang). Nao ein eurke plat te hebbe laege van 't lache nog ff ein kleine pauze um vervólges ózze muzikale vastelaovend aaf te sloète met nog ein daverend rundje. Nou ja, daverend..... De piëp waas laeg, vuuël lippe kepot, en de nuuëdige blaore op de hand... We hebbe ós, met hölp van 't publiek, der door mótte sleipe. En det lökde dan ouk nog. Um 23.00oor, wie alles opgeruùmp waas met 't gedeuns nog ff nao 't stadhoès um aafschied te neme van ós Dreejspan-vrinde. Dao woord weer minnig träönke gelaote, maar nemes dae det kós zeen want ein daverend ónweer sloot veur ós (althans veur ógge schriever) de vastelaovend aaf. Eine hièle sjieke vastelaovend. Wiès 't weer ens is!
4 fibberwari 2008 - Groeëte Optoch en optraeje BdW/Steinstraot Det begós al good... in Hergodsvruùgte nao ós thoèshónk, BdW, in ein miezige raege.. Det belaofde neet vuuël goods, zeker net veur ós nieje pakke, die dusdanig "fien" zien, met zoevuùl detail, det idderen druupel funest kin zien. En ein plastic täöt druuëg ouk neet beej aan de juuste prissentasie. Nao ein partiej schmiencke gaon we um 12.30 oor nao de Ponywaeg. Wie de iërste dao aankwaame zooge zeej net #30 de Boermansstraot in verdwiene.. Det woort dus ouk nog spaoje...in de struimende raege... Complimente krege weej genóg, wie had 't der oét gezeen ónder ein straolende zón? 't waas iëwig zunt van ál dae raege. Aan ein stök door veel 't water oét de lòch. Gaef ós dan maar sniej of vors! Binne ein oor waere weej, door en door naat, al beej 't Póskantoeër. Zelde zoeë naat gewaes en zelde zoeë weinig minse langs de kant. Zunt veur al die deilnemers, maar zeker ein pluum veur die minse die waal hebbe gekeke en 't ellendige weer hebbe getrotseerd. Met hölp van 't persenièl van Baer de Woers, zoeë good en zoeë kwaod as det ging de kleier waer druuëg gekrege. 't leek waal ein stoumerie op de bäóveste verdeepinge. Nao d'n bik ein 3-tal rundjes van idder ein oor gespeuld. Ein erg strak optraeje, wao-ouk de vastelaoves vierders op de Steinstraot van kóste meigeneete, aangezeen Fredje ós geluùd nao boéte had doorgeschakeld. Ein alde fan (Mandy) zooge we ouk weer ens, en vuuële andere bekinde. Erg sjiek allemaol en erg gooje reacties. 't bleef daonao nog lang (in positieve zin) ónröstig beej Baer. Truste
3 fibberwari 2008 - JocusPocus, Baer deWoers, JoekskapelleParade Eine "zwaore" daag stónd veur de deur. Iërs schmiencke um vervólges met den ganse bubs nao de Maaspoort te verkasse wao weej JocusPocus móchte äöpene. Alles waas geregeld, geluúd, tièdschema alles......... en 't meug ouk waal ens gezag waere: noow waas 't good in de hand (det zoel de vólgende kière ouk mekkelik kinne, toch?) Vervólges nao BdW, ff waat aete, lippe rös gaeve en vervólges 2 rundjes PoCoPoCo. Gezellige Venlose leedjes, genne bombarie. Woord gewaardeert, en zoeë mót det ouk. Nóg genne tièd um dien kónt te kratse: Al 't ald iézer (slaagwerk), träöte en ander ónmisbaargedeuns ónder d'n erm opwaeg nao Dante um de JoekskapelleParade aaf te sloéte. De Frette hadde 't weer keurig veurmekaar. Alles klóp, de Frette zien enthousias en de Joekskapelle dus ouk. En dan is 't publiek det uiteraard ouk. Um elf euver elf 't podium op en knalle. Nao ein paar nummers kwaame Hoeëgheid Ton 1 en de Adjes Frans en Sjaak der beej um 't fees compleet te make. Zeej oét d'n bol, weej oét d'n bol, de Frette oét d'n bol, en 't allerbelangriékste: 't massaal aanwezige publiek oét d'n bol..... en dao doon we 't veur: veur de JOEKS! Neet te laat (nou ja) plat, morge is 't weer vruúg daag. Daag!
2 fibberwari 2008 - Prónke oppe Klaosstraot/BdW Jaaaaaaaaaaa, 't geit loos. Traditioneel speule weej oppe Klaosstraot beej 't Prónke. De Parade, de Mert en waat neet miër laote we maar veur waat 't is... dao kinsse in dien bloeëte kónt op de bühne gaon staon en dan hebse nóg succes.... Bedinkelik.. Nao 't schmincke in ós hoèskamer, beej BdW dus, um 15.00 oor träöte in de Klaosstraot. Altiéd weer sjiek. De bereiks misschiens maar 300 minse, maar die bereikse dan ouk éch. Heerlik. Hoeëgheid Ton, Frans, Sjaak en eur gevólg hebbe zich uiteraard waer laote zeen en ózze Paul kwaam met ein Amerikaans nichje veurbeej: Well, I thought Mardigrass was something special, this beats it all... I love Venlo.... Leuk huùr. Um 't compleet te make nog ff aangegaeve det ós vastelaoves vereiniging Jocus óngevier net zoeë ald is wie zien geboorteland, en det Huize Schreurs der al stónd wie de Indiane "Gods own country" nog neet ens óntdek hadde. Aansloétend beej BdW geträöt.. Nao Toetie en veur Minsekinder. In twieë oor tièd hielemaol laech geträöt. Den bik waaas good, 't beer kald en det waas 't . Oké nog ein friet-ei op de Picardie. Truste..
1 fibberwari 2008 - Vastelaovesborrel ING Bank 't Höfde zich in de stad, neet allein de schoeëljeug haet d'n vriejdaag veur de vastelaovend toegevoog as 5e vastelaovesdaag, bedrieve hebbe det ouk gedaon. ING haet d'r ein ganse zitting van gemák: Toddezék, W-3, Jocus'leedjes, NUATH.... d'r woord ff oétgepak beej de Witte. Hoeëgheid Ton, Frans en Sjaak ware ouk van de partiej. Ff met Ton en Frans gepraot: die jónge blieve greuje in eur rol. Geweldig. In die tieën minute det zeej ff ein glaeske kóste drinke naeve de bühne zien ze waal 10x bedank en gecomplimenteerd.. Det zaet genog. Ós optraeje was weer strak. Ein nieje act hebbe weej ouk, Daan liént zich as de perfecte stuntman. Struukele euver ein monitor box, veureuver de bühne aaf lazere met in de linkerhand de schuùf en in de rechter de camera. Hae haet ónderwiel waal foto's gemak, maar träöte , det kós hae neet. Toch jaomer Daan. Blieve oefene.... Gelökkig is der nix kepot gegaon:van de instrumente neet en beej Daan neet. De minse hebbe genaote en deeje vol euvergave mei, en zoeë huùrt det. We ware nog gén 5 minute klaor wie de stroum oétveel..... Op naoBdW wao Neet oét Lottum op de bühne stond. Ein lange riej veur de deur: Ouk det zaet genóg. Via de zie-ingangk nao binne en de instrumente opruùme en dan nog ein pilske....
31 jannewari 2008 - Beatrix jäörig/ Alde Wiever Bal Beej BdW höfde 't zich aangezeen Bram & Ruud eur receptie hadde vanaovend. Tösse de receptiegangers dook aaf en toe ein ald wiéf op. Gezellg waas 't aevel waal. DE KOP IS DER AAF, VASTELAOVEND IS BEGÓS!!
NIEJSBREEF NUATH Nummer 2 is oét ! Aan te vraoge beej: Dit emailadres is beveiligd tegen spambots, u heeft javascript nodig om het te kunnen bekijken Ónderwerpe: Zweij mei NUATH kap d'r neet mei Joekskapelaoke en vuuël miër !!! downloade kin heej
30 jannewari 2008 - Letste Rippetiesie De letste rippetiesie veur de vastelaovend is traditioneel! Waat det inhild kin ik óg neet oétlegge (en meug ik ouk neet). Maar lache is 't waal. Vandaag ouk de letste kiër det Wim Roeffen veur de groep haet gestaon. Wim haet ós 't aafgeloupe jaor oétgeholpe waeges de aafwezigheid van Maurice (studie). As dank veur Wim zien gedöld én vakmanschap is hae m.i.v. van vandaag "NUATH Ière Stökskeszweijer (1e klasse Z.V.)" Ein plaquette en ein oorkonde huuëre heej uiteraard beej. Wim goof aan det hae altièd bereid is um weer in te valle, moch det nuuëdig zien.
25 jannewari 2008 - Vastelaovesbal VV Belfeldia- Belvend Veur 't iërs in jaore weer ens in Belvend meuge speule. Via ein paar fans woorte weej gevraog um ós muzikale beejdrage te levere aan ein ge-wel-dig fees... Det guuëf altied te dinke. Maar waat waor is is waor, die Belfendse kinne ein feesje bouwe. Dao zal die Bitburger Bräüerei neet ontevreeje euver zien gewaes. Det de zaal ein nogal "geluuds-absorberend-plefón" haet waas nao ruúm 2,5 träöte veur ós waal duùdelik. Det de zaal vólgend jaor verbouwd geit waere is ouk duùdelik.... Maar of det aan ós optraeje haet gelaege???
25 jannewari 2008 - Scouting bal Miquel Pro - Venlo Op snip en äörke kwame ze der beej de Scouting achter det 't al haos vastelaovend waas. En dus meus op snip en äörke van alles geregeld waere, zelfs ein Joekskapel. Aangezeen 't verzeuk van de scouting nét in te passe waas in ós schema hebbe we veur de blaage nog ein diek oor kinnen speule. Same met Jocus Toekoms woord 't ein gezellig feesje!!
20 jannewari 2008 - Prinsereceptie De Vogelhut - Venlo As "receptie-orkés" hoof neemus NUATH te vraoge, weej zien dao de kepel neet veur, aevel, op eedere regel is waal ein oétzondering, zoeë-ouk beej NUATH. De receptie van de Vogelhut speule weej waal. Waorum, umdet dit al 32 jaor zoeë is. Al 32 jaor sjiek. Protocol, dao hebbe weej schiet aan (althans, we doon net as-of). Jao, ouk volgend jaor weer.....
20 jannewari 2008 - Prinsereceptie Ton I (Tonnie?), Frans en Sjaak JOCUS - Venlo Nao eine zwaore aovend in Lomm haet de ganse kepel 't klaor gekrege um tiejig in de Maaspoort te zien. Gerrie en Paul hebbe de nach doorgewerk um nog ein passend kedoo in-ein te schroeve, De Vogelhut woel ós waal as "hoes-kapel" hebbe en zoe-doonde kóste we ós Ière leeje waerdig felicitere in de Maaspoort én ouk nog tiejig de receptie äöpene op den berg. Dankewaal Vogelehutters det geej os de ruumte heb gegaeve (en ouk nog heb gezörg veur bruuëdjes FANTASTISCH-TIES (ke)
19 jannewari 2008 - Ós Ièreleeje Ton en Frans in 't Jocus Dreejspan 2008!! De geruchte ginge al ein paar jaor, maar noow is 't ein feit. Ózze vrind, Ièrelid en Nappes op de Proms mei-organisator Ton Lamberts zweijt de kómmende waeke de scepter euver 't Venlose Jocus rièk. Dit geweldige niejs krege weej middels ongevier 100 SMS-jes binne tiejes ós optraeje in Lomm. We hebbe dao alvés ein nummer aan eur opgedrage (en der ein paar op geklep). Op eur?? Maar der zien der toch dreej in ein dreejspan? Um 't fees compleet te make is Sjaak Schattorjee as twieëde (of 1e?) Adjudant gevraog.
Gluif maar det NUATH én Nappes gruuëts zien op dit fantastische Trio (sorry: dreejspan) Weej winse eur ein paar fantastische waeke en eine super vastelaovend toe!! De lang verwachde fotoserie "Ton en Frans as "gewoëne jónge" kint geej vinde op de pagina Nappes - Comittee
19 jannewari 2008 - Prinsereceptie De Tiejeteuters - Lomm Op oétnuuëdiging van de Tiejeteuters hebbe weej de aafsloeting van de Prinsereceptie van 't 4 span (Jaowaal) van Lomm meuge verzörge. Ein sjiek optraeje wao zoeëwaal "weej as zeej" van genoate hebbe. (Dit aafgemaete aan de reacties van de Tiejeteuters zelluf). "Volgend jaor waer?" vrooge zeej "Volgend jaor waer!" zachte weej
13 jannewari 2008 - Prinsematinee De Beerpiëp Op oétnuuëdiging van de Beerpiëp hebbe weej 't Prinsematinee van Prins Peter IV opgeluùsterd. Net wie 't vurrig jaor op eur Zitting waas 't ouk noow wiès in de puntjes verzörg in d'n Haandert. Van de óntvangs wies aan de oétgeleide nao ós optraeje waas prima verzórg. Det beteikend veur ós det weej der 3x zoeë hard taege aan gaon um der waat sjieks van te make. Aafgemaete aan de reakties van de Beerpiëp zien we dao-in (opniej) geslaag, of we 't vólgend jaor truùk wille kómme.... Jao gaer!
12 jannewari 2008 - Pallesaotebal De Kwas De Kwas haet 't gewaog um ein bal op puuët te zette waat herinneringe oprup. Herinneringe aan bals wie ze in 't Venlose vruuëger georganiseerd woorte. Det dao animo veur is bleek gisteraovend waal. 't Tref barsde oét zien vooge. De 4 winnende leedjes, Marco Schell, Ben Verdellen, NUATH, de nieje Prins van de Kwas, Prins Arthur den 1e en uiteraard ós zuster-kepel/orkes M!xx. Dét i.c.m. ein gooj en enthousiasde organisatie is alles waat nuuëdig is um eine geweldige aovend te organisere en belaeve!
7, 8, 9 jannewari 2008 - Reacties op Boeremoosbal Laot 't duúdelik zien det NUATH gaer (Venlose) Vastelaoves meziék mak (inclusief de neet drék Venlose- maar "beejbehuùrende" leedjes). Laot ouk duùdelik zien det weej gaer optraeje op plaatse wao ein organisatie ós vruuëg. Waere we neet gevraog, dan is det ein keuze van de organisatie. Ein organisatie bepaold zelf wie zeej eur aevenement(e) muzikaal in wille völle. Zeej kinne eur doelgroep, weite welke sfeer ze wille bereike enz. Det is (gelökkig) neet aan ós. Respek waasse eemus tuuëns kriegse ouk truùk.
6 jannewari 2008 - Aafsloète Venlo op Iès Traditioneel, det meuge we noow aal zegge, sluùt NUATH de letste zóndaag (de Venlose middaag) in 't Paviljoen beej de schaatsbaan muzikaal aaf. Ouk traditioneel is det de vreejwillgers én St.Pieter van R. deze middaag in 't zunke waere gezatte. Terech. Ouk traditioneel is det diezelfde vreejwilligers gans oét den band (meuge) springe. Ein köstelikke middaag.....
5 jannewari 2008 - Boeremoosbal Maaspoort NUATH haet zien kunste waer meuge vertuuëne op Jocus bühne. Uiteraard met volle inzet en met gooje respons oét de zaal. Det 't organisatorisch van gén kante klop dao kinne we van A tot Z ein bukske euver aope doon. Óg laot ouk maar. In iddersgeval voor veur kiepig gastebook.
NIEJSBREEF NUATH Nummer 1 Ónderwerpe: NUATH Kap der mei Nappes op de Proms 6 op 17&18 Jannewari 2009 'nn quiz en vuuël miër !!! downloade kin heej
21 december 2007 Ôzze websait is inmiddels 35.000 kiër bekeke. Fijn róndgemak door "Gashoes VieCurie"
6 september 2007 =ZURTITRIE= is de veurluipige werktitel van ’t volgende NUATH projec. Al jaore ónderscheid NUATH zich met projecte die verniejend zien, zeker in de categorie Joekskapelle. Net nao de vastelaovend 2007 hebbe we ein aantal ingevraore ideeje óntduujd en op waerd ingeschat. Vas stónd det weej in d’n aanluip nao ós 3x11 jäörig bestaon det ingevraore idee vorm woele gaon gaeve. Waat det ideej precies inhild halde weej nog ff veur ós, maar ein aantal al dökker gebroekde NUATH ingrediente hebbe we alvés ingekoch. · Zoeë krieg jónk talent weer alle kanse um zich veur, achter en óp de bühne, te manifestere, uiteraard same met NUATH. Dit ingredient hebbe weej al jaore gebroek tiejes vastelaoves optraejes en beej alle oétveuringe van Nappes op de Proms · Ein ingredient, ’t belangrièkste waat ós betref is det ’t ein verniejend projec mót zien. Ouk dao hebbe we kieës van gegaete. · Veur jónk én ald(er) Met al die ingrediente (uiteraard hild de ChefKok altièd ein aantal ingrediente geheim) hebbe we Ray Drossaert bereid gevónde um ’t ein en ander vorm te gaon gaeve. En dan vlakke we ós, op dit moment twieë, dirigente (Maurice Delsing en Wim Roeffen) netuurlik gaar neet oét. Maurice en Wim zulle ós met harde hand weer de juuste richting in douwe, móchte weej tevaer van ’t muzikale paad aafrake. Hald oere en ouge aope, heej wilse Nappes van misse!
24 juni 2007 - Wim Roeffen 28 april 2007 - Links 't Zal waal door de hoeëge temperature kómme, maar de pagina nao alle links van "zuster-Joekskapelle" , vastelaoves vereiniginge, muziekale collega's e.d. is waarschienlik weggesmólte. Weej haope binne ein paar waeke dees "service" weer te kinne verliène.
27 april 2007 - Wikipedia Vanaaf vandaag haet NUATH ouk ein vermelding op de Limburgse variant van Wikipedia! Kiek maar ens beej: http://li.wikipedia.org/wiki/Neet_um_aan_te_huure
1 april 2007 - Nuath jäörig Onder ein straolende zon is NUATH begos aan ziene 31e verjäördaag. Alleriërs eine brunch in 't museum, vervolges d'n Palmhöltjes optoch en de zaege van Keplaon Breuren. Ein pilske beej Baer de Woers completaerde 't gehiél. Nou ja, ein parkeerbón van €57 mog de feesvreugede neet drökke!
24 maart 2007 Langzaam aan krieg de site ein andere völling. Sins ein paar daag kint geej meziek van NUATH's CeeDeekes en opnames van Nappes op de Proms beluùstere....... Ge kint de MooderMaas videoclip bekièke........ Of ein compilatie van iërdere Nappes op de Proms oétveuringe op video truùk zeen.
10 maart 2007 Langen tied zien weej (en geej) verstaoke gebleve van 't letste niejs. Raeje heejveur waas ein aanpassing aan de NUATH-site. Qua uuterlik is der neet zoevuuel veranderd, aan d'n inhald destemier. De kommende daag gaon de NUATH-webmeisters zich spaoje met 't verweidere van ald greij en t plaatse van nieje zake op dees site. Kom gouw waer truuk en belaef 't mei!
|